Kapulisan nagpahimangno batok sa rent- sangla modus

NAGPAHIMANGNO karon ang kapulisan sa publiko batok sa rent-sangla modus.

Kini ang gibutyag ni Police Captain Akmad Diocolano, deputy chief of police sa Alabel Municipal Police Station human may narekober nga sakyanan sa ilang AOR nga biktima sa rent-sangla modus.

Ala una sa hapon, Marso 1 na-intercept ang usa ka Wigo kolor puti sa Barangay Bagacay, Alabel nga gipanag-iyahan sa usa ka Gregorio Belgira

Asoy sa tag-iya sa sakyanan sa kapulisan nga kaniadto pang Setyembre miaging tuig girentahan ang iyang Wigo sa usa ka Catherine Sales apan human nakabayad og duha ka bulan, wala na nabalik ang sakyanan.

Giprenda matud pa ni Sales sa usa ka Belen Pagingan nga usa ka negosyante ug na-locate ang sakyanan pinaagi sa GPS.

Nabalik sa tag-iya ang sakyanan ug giawhag sa kapulisan nga mupasaka og kaso batok sa nagprenda sa sakyanan.

Awhag na lamang ni Diocolano sa publiko dili basta modawat og prenda labi pa kung dili kaila aron dili mabiktima.

Nasayran nga naprenda ang Wigo sa kantidad nga P200,000 apan gibawi sa tinuod nga tag-iya gikan sa giprendahan.