NAGTINABANGAY ang kapulisan ug force multipliers aron mahimong malinawon ang adlaw nga Dominggo sa General Santos City, sa gipatuman nga ‘No Movement Sunday’ subay sa Executive Order no. 22 aron mapugngan ang pagsaka sa kaso sa COVID-19.
Sayo pa sa buntag mingaw na ang kadalanan, sirado ang mga establisemento samtang ang kapulisan nituyok sa ilang tagsa-tagsa ka area of responsibility kuyog ang grupong Cyklista at Motorista ng Pilipinas Inc. kon CYMPIL sa managlahi usab nga chapter.
Sumala sa tigpamaba sa kapulisan sa GenSan nga si PM Rissa Hernaez ang CYMPIL, aktibong force multiplier sa kapulisan nga motabang sa istriktong pagpatuman sa Executive Order 22 nga may titulong ‘Reiterating the strengthened border control measures and setting additional guidelines for the “boxing in” strategies to prevent the further spread of the disease.’
Sumala usab sa Chairman sa 39.2 CYMPIL Chapter nga si Wilfredo Acebes matag Dominggo sila motabang sa kapulisan, mutuyok sa mga kalye sa barangay,ang mando kanila nga sitahon ang mga pasaway,ang naga abli nga tindahan unya ang nagalatagaw nga mga tawo ug motorista.
Ang hangyo ni Acebes sa mga tawo nga mosunod lang sa kamanduan aron nga dili masita kay alang sa kaayuhan sa tanan ang ilang ginahimo.
Sa Barangay West usab nitabang ang Promiseland 2 Mabuhay CYMPIL Chapter sa pagpanguna ni Damiano Calma Jr.
Sumala kay Calma ilang gisulod ang mga kalye sa Barangay West ug gipahimangnuan ang mga tawo nga dili maglatagaw, unya gisita ang mga tindahan nga ni abli sayo sa adlaw nga Dominggo apan sa sunod nilang balik aduna nay tiket nga i-isyu sa nagasupak sa kamandoan. Si Jun Aranas lomolupyo sa Barangay West usa sa nisimba sa Our Lady of Peace and Good Voyage sumala niini nga dili siya supak sa ginahimo sa taga gobyerno matag adlaw nga Dominggo kay alang kini sa kaayuhan sa tanan, gamay lang sila ang nagsimba sa 3rd mass ug puno gayod sa pag- ampo nga unta maundang na ang pandemya ug makalahutay ang mga nataptan sa virus. ( Ever Diazon)