Karne sa baboy pabiling taas human sa nadeklarang state of calamity

NAGPABILIN sa taas nga presyo ang karne sa baboy sa merkado publiko sa General Santos City ning gapadayon krisis gumikan sa epekto sa African Swine Fever kon ASF.

Ang belly anaa sa P300 pesos sa kada kilo, porkchop, baga, laman sa P290 pesos, pata,  ribs, mascara  sa P245 pesos, atay sa P50 pesos, ordinary bones sa P200 pesos ug laman loob sa P100 pesos.

Sumala sa bag-ong pangulo sa General Santos City Meat Vendors Multipurpose Cooperative nga si Toto Mosqueda  dili  mahimo nga mopamahal sila og presyo kay ma-apektuhan usab ang ilang mga suki nga adunay mga kan-anan ug ang mga mamalitay nga adunay selebrasyon sa ilang panimalay mao nga wala na nila gipaabot sa P320 hangtud P350 pesos matag kilo.

Sa karon ang Farmgate price sa buhing baboy anaa sa P185 pesos ang matag kilo samtang sa panahon nga wala pa ang ASF anaa lang kini sa P90 pesos matag kilo.

Kahibaluan nga nagdeklara na ang gobyerno og state of calamity ilawom sa Proclamation number 1143 hangtud sa katapusan sa tuig 2021 gumikan sa ASF aron nga makahimo og lakang ang nasudnon ug lokal nga gobyerno.

Sa bahin sa labaw sa City Vetirinary Office nga si Dr. Antonio Marin maayo nga nagdeklara og state of calamity ang nasudnong gobyerno kay  apektado sa ASF ang Luzon ug Visayas lakip ang Davao mao nga nagkinahanglan og igong pondo aron mapugngan ang ASF.

Gidugang ni Marin, sa bahin sa LGU GenSan wala pa ang deklarasyon sa calamity nigahin na og walo ka milyon ka pesos alang sa prevention ug ang dakung bahin sa pondo naga-adto sa sweldo sa nagabantay sa checkpoint aron dili kalusot ang mga buhi ug naproseso nga karne sa baboy gikan sa apektadong mga lugar. ( Ever Diazon)