Mitaas ang kaso sa dengue karong tuiga itandi sa milabay’ng tuig 2022.
Sa datos sa The City Health Office (CHO), anaa sa 1,506 dengue cases gikan Enero hangtod sa Agosto karong tuiga diin mas daghan itandi sa susamang period sa tuig 2022 nga anaa sa 1,052 ka akso.
Kinatibuk-ang 28 na ang namatay gumikan sa dengue diin mas taas sa 13 sa milabay’ng tuig gikan Enero hangtod Agosto.
Aminado hinoon si CHO Tropical Diseases Division Head Melodina Babante, nga dunay pagsaka sa kaso karong tuiga kini gumikan dili regular nga weather patterns nga nakatabang sa breeding process sa lamok nga nagdala sa dengue.
Mihangyo sab ang opisyal nga matag barangay magtukod og kaugalingong Barangay Mosquito-Borne Viral Disease Task Force aron nga maminusan ang kaso sa maong balatian sa ilang lugar.
Ang task force mutabang sa pagmonitor ug pagpakgang sa mga lugar nga mamahimong breeding sa mga lamok.
Dugang pa ni Babante, nga gitugotan sa CHO ang mga opisyal sa barangay nga makatabang sa interbensyon sa nasangpit nga sakit.
Siyam lang sa 182 ka barangay sa dakbayan ang adunay Mosquito-Borne Viral Disease Task Force. Kini nga mga barangay maoy dunay pinaka-ubos nga ihap sa dengue infections sa miaging mga tuig, nga nagpakita nga ang task force episyente sa pagpaubos sa mga kaso sa dengue.
Samtang, pahinumdom na lamang sa publiko nga sundon ang 5-S strategy aron malikayan ang sakit nga dengue:
- Susihon, pangitaon ug gub-on ang mga posibleng kapuy an sa lamok
- Sayo magpakonsulta sa pinakaduol nga health center
- Siguradohon ang pag protekta sa pamilya ug kaugalingon
- Suportahan ang mga pamaagi sa gobyerno sama sa fogging ug spraying
- Sustain hydration – kanunay ang pag-inom og oral rehydrating salt (ORS) ug tubig kung dunay gibati nga sintomas sa Dengue