MIUSBAW ang kaso sa dengue sa GenSan sa unang upat ka semana ning tuig 2023 kung itandi sa samang panahon miaging tuig 2022.
Segun ni Dr. Karl Igrobay, Acting Assistant Department Head sa City Health Office (CHO) GenSan nga mitaas ang dengue cases sa 95%.
Base sa datos, anaa na sa 189 ang kumpirmadong kaso sa dengue sa GenSan ug duha na ang namatay
gikan Enero 1 ngadto na Enero 31,2023.
Nagpabilin usab matud pa ang mga dagkong barangay nga adunay mga taas nga kaso sa dengue.
Kini giangkuban sa Barangay Labangal, Barangay Calumpang, Barangay Fatima, San Isidro ug Barangay Apopong kung asa kini ang mga barangay nga gikonsiderang highly populated.
Gikabutyag usab sa doktor nga anaa sa 1 ngadto 81-anyos ang mga biktima ug 18 anyos ang median age o sagad maigo sa dengue, samtang ang duha nga namatay anaa sa 1 ngadto na 20-anyos.