MITAAS sa 104 percent ang kaso sa dengue fever sa GenSan nga mokabat sa 737 sukad Enero hangtud ning bulan sa Hunyo.
Matud sa City Epidemiology Surveillance Unit sa maong ihap walo na ang namatay nga mas taas sa miaging tuig nga anaa sa 362 ug lima ang namatay.
Sa datos sa CESU ang mga nag-edad og 10-anyos paubos ang sagad maoy mabiktima sa dengue fever.
Gipagawas usab sa maong datos nga mga barangay sa GenSan nga taas ang kaso sa dengue fever, kini mao ang Barangay Fatima nga adunay 135, Calumpang sa 119, San Isidro sa 108, Labangal sa 84 ug Lagao sa 54.
Una na usab giawhag ni Dr. Jett Oco, labaw sa City Health Office ang mga ginikanan kung may hilanat ang ilang anak, ipa-check up sa health center aron masayran ang unsa mang buhaton ug malikayan ang mga kumplikasyon. Giawhag usab ang katawhan nga kanunayng buhaton ang pagpanglimyo gawas ug sulod sa balay, iyabo ang mga butang nga may tubig, kung kung may hilanat, magpakonsulta.