Nagdangat sa 31 ang panibag-o nga kaso sang dengue sa probinsya sang Capiz base sa ginpaguwa nga datos sang Department of Health Western Visayas Center of Health Development – Regional Epidemiology and Surveillance Unit (RESU) Morbidity Week No. 25 napetsahan Enero 1 tubtob Hunyo 22, 2024.
Bangud sini, naglab-ot na sa 503 ang kabug-usan nga kaso sang nasambit nga balatian sa probinsya kun sa diin isa ang nabalhag nga napatay. Suno sa DOH-6, yara sa 25% ang pagtaas sang kaso sa Western Visayas kun ikumpara sa kapareho nga period sang 2023.
Padayon naman ang panugyan sang ahensya natuhoy sa “4S strategy” batok sa dengue lakip ang pagpangita kag pagpamatay sang mga ginapugaran sang lamok, pagpangita sang madasig nga pagbulong kag pagsunod sa mga pamaagi sang self-protection. | Judy Ann Juare