Nagdangat na sa kabug-osan nga 179 ang nabalhag nga kaso sang dengue sa probinsya sang Capiz sumogod Enero 1 tubtob Mayo 13, 2023 base sa provincial degue case bulletin.
Sandig sa datos nagikan sa Capiz Provincial Health Office (PHO), nagtaas sang 80.81% kun ikumparar sa 99 nga kaso sa kapareho nga period sadtong tuig 2022.
Nagapanguna sa may pinakamadamo nga kaso nga nabalhag ang banwa sang Tapaz nga may 65; Roxas City nga may 32; Pontevedra kag Dumalag nga may tig-11; Mambusao, Panitan, Panay, Dumarao kag Pilar nga may tig-7; Jamindan kag Sigma may tig-5; 4 sa Ivisan kag Cuartero; 3 sa Sapian; President Roxas kag Dao nga may tig-2 ka kaso samtang hilway naman sa nasambit nga sakit ang banwa sang Maayon.
Pinaka apektado nga age group sa amo nga balatian nga may 22.31% ang naga-edad 5 tubtob 9-anyos.
Padayon naman ang panugyan sang PHO sa publiko, nga sundon ang pag-obserbar sang 4s strategies batuk sa balatian nga dengue; Search and destroy, Secure self-protection, Seek early consultation kag Say yes to fogging. | KMD Gicalde