Kaso sang Lambda Variant, gintawag ni Valladolid Mayor Miravalles budlay patihan

“Mabudlay patihan”, ini ang pahayag ni Mayor Enrique ‘Bebot’ Miravalles sang banwa sang Valladolid may kaangtanan sa kaso sang Lambda variant sang Covid-19 sa iya sini nga banwa sa diin nahauna nga kaso sang kasubong nga variant sa bug-os nga Pilipinas.

Sandig kay Mayor Miravalles paano makaangkon sang Lambda variant ang 35 anyos nga iloy nga nagbun-ag sang iya ginadala nga lapsag sadtong nagligad nga Hulyo 22 sa Corazon Locsin Montelibano Memorial Regional Hospital nga wala gani sang travel history ukon wala makatilaw sang biyahe sa guwa sang probinsya sang Negros Occidental.

Dugang ni Miravalles, sadtong lunes, Agosto 16 liwat ginpaidalom sa swab test ang nasambit nga iloy ginpahayag nagpositibo sa Lambda upod ang iya sini nga baby sa diin sandig sa resulta, ini sila ang lunsay negatibo sa coronavirus.

Nagalibog ang ulo sang alkalde kun sa diin nakuha sang isa niya ka pumuluyo ang nasambit nga variant sa pihak nga wala ini makatilaw biyahe sa iban nga lugar. Mismo ginpaalinton ni Miravalles nagaduda siya sa data nga ginpagguwa sang Philippine Genome Center pinaagi sa Department of Health nga suno sa iya daw sa “palagpat”.