Nagpabilin sa 27 ang nabalhag nga kaso sang leptospirosis sa bug-os nga probinsya sang Capiz, base sa pinakaulihi nga datos nga ginpaguha sang Provincial Health Office (PHO).
Base sa Morbidity Week 16 nga nagasakop sa panahon nga Enero 1 tubtob Abril 22, 2023, ang nasambit nga numero ang 145.45% nga mas mataas kun ikomparar sa kapareho nga period sadtong tuig 2022 nga may 11 lamang ka kaso.
Nagdangat naman sa lima ang napatay bangud sang nasambit nga sakit nga isa ka sahi sang inpeksyon nga makuha sa higko kag ihi sang sapat nga may impeksyon kasubong sang ilaga kag iban pa.
Nagatuhaw ang ini nga balatian kon masami nga naga-ubog sa tubig baha nga kontaminado bangud sa ihi ang ilaga kag iban nga sahi sang sapat.
Madasig nga maglaton ang inpeksyon sa lawas, ilabi na kon may pilas ang isa ka indibidwal.
Ang balatian nga leptospirosis ang mahimo nga magresulta sang kamatayon kun mapabayaan kag indi gilayon mabulong.
Sarang man ini makaguba sang kidney, baga, atay kag iban pa nga organs.