Mipasidaan karon ang kapolisan sa katawhan batok sa pagpunit sa kadudahang eksplosibong butang nga makita sa bisan asa nga lugar.
Kini ang gibutyag ni Sugbongcogon Municipal Police Station, Chief Investigator Police Staff Sergeant Randolph Sabuera homan natala ang pinaka-unang explosion incident sa ilang area.
Diin nahimong biktima niini ang usa ka 10-anyos nga batang babaye sa Purok 3 Barangay Ampianga, Sugbongcogon, Misamis Oriental.
Una nang migawas sa imbestigasyon sa Explosive Ordnace Disposal nga gituohang usa ka 40 mm cartridge o bala sa M203 grenade launcher ang mibusikad sulod sa panimalay kung asa nagpuyo ang bata.
Posibli sab nga gidulaan o gitandog kini sa bata hinungdan nga nabuthan kini sa gihuptan nga eksplosibong butang.
Gisuta na karon sa otoridad kung asa gikan ang M203 grenade launcher, diin ang nahisgutang barangay lakip sa GIDA area o Geographically Isolated and Disadvantaged Areas, kung asa niadtong 2012 dunay engkwentro tali sa pwersa sa gobyerno ug rebeldeng grupo.