Katukuran sa WTE sa Davao City gipaboran sa DENR

GIBUTYAG ni Davao City Mayor Sara Duterte-Carpio nga supurtado sa Department of Environmental and Natural Resources (DENR) ang budgetary requirements alang sa katukuran sa Waste-to-Energy (WTE) project sa Davao City.

Sigon kang Mayor Inday nga positibo ang tubag sa ahensya nga maoy moabaga sa gikinahanglang pondo sa proyekto nga unang gipasalig sa national government apan gibalhin ngadto sa DENR base sa rekomendasyon sa Davao Regional Council.

Ang WTE project giplano sa City LGU ug sister city niini nga Kitakyushi sa Japan, gisugdan isip waste management option tulo ka tuig na ang milabay gumikan sa hapit na makab-ot sa existing sanitary landfill ang full capacity.

Una nang nakapalit og 10-ektaryang yuta nga project site sa Brgy. Biao Eskwela, Tugbok District ang lokal nga panggamhanan.

Kahibaluang subay sa naunang pahayag sa Interfacing Development Interventions for Sustainability (IDIS), usa ka non-profit environmental protection group, nga dakong hulga ug gitawag nga inhustisya sa kinaiyahan sanglit ang incinerator sa proyekto ipahimutan dool sa rural poor community.

Gilantaw sa grupo nga pinakamaayo ug pinakaepektibo sa pagkunhod sa greenhouse gas emissions gikan sa mga hugaw/basura mao ang pag-institutionalized sa mga lakang sama sa single-use plastic ban, refill-and-reuse systems, productive biodegradable waste management, ug saktong pagpatuman sa ecological solid waste management ug dili ang WTE incineration.BNFM-DAVAO

Leave a Reply

Your email address will not be published. Required fields are marked *