Hustisya ang singgit karon sa pamilya sa 19-anyos nga dalaga nga gidunggab-patay sa gikaingong anak sa aktibong pulis sulod sa panimalay niini sa Nafarette Compound, Balongis, Barangay Balulang ning syudad sa Cagayan de Oro.
Sumala sa amahan nga si Marjon Enclonar, dunay nakakita nga misulod sa ilang panimalay ang suspek nga si alyas ‘Jomar’, 19-anyos ayha napalgang-patay sa dalagang biktima nga si Kisseah Claire Enclonar, 19-anyos, 1st year Civil Engineering Student sa USTP kon University of Science and Technology of Southern Philippines.
Dugang pa sa amahan nga nag-inusara lang ang iyang anak nga nabilin sa ilang panimalay niadtong higayonan gumikan pang-hapon ang schedule niini sa klase.
Inisyal nga pag-imbestiga sa SOCO kon Scene of the Crime Operative Regional Office 10 nga dunay dinunggaban sa dughan ug samad sa ulo ang dalaga nga miresulta sa iyang hinanaling kamatayon.
Nagpadayon pa karon ang imbestigasyon sa Carmen Police Station 4 sa pagpanguna ni Police Major Mario Mantala ug paglakag sa suspek nga gikaingong gagamit sa gidiling droga.-END-