Hugot nga gihangyo sa City Disaster Risk Reduction Management Department sa Cagayan de Oro ang kooperasyon sa katawhan alang sa malinawon nga pagbalaan sa Semana Santa.
Malaumon si CDRRMD Manager Nick Jabagat nga musanong ang katawhan sa gipagawas nga gabayan sa syudad labi na kadtong mga buot mudalikyat sa mga pilgrimage sites, ug uban pang dagsaonon nga lugar.
Subay niini, hugot nga nakatutok ang nahisgutan nga buhatan ug andam sila sa pag-responde sa unsa man nga kakulian kaabag ang deployment sa kapolisan sa Cagayan de Oro City Police Office, Task Force Oro ug mga force multipliers gikan sa nagkadaiyang barangay.
Kahibaloan nga basi sa executive order no. 067-2023 ubos sa General Guidelines sa Observance sa 2023 Holy Week, strikto ang pagsunod sa minimum public health standard ilabina gayud ang pagsul-ob kanunay sa facemask.
Gidili usab ang pagpanigarilyo lakip ang vaping lakip ang pagdala sa hinagiban ug speakers o sound system sa mga PANAAD sites sama sa Guadalupe Shrine, Malasag Area ug mga simbahan panahon sa kasaulogan sa Semana Santa.