ANGAYANG atubangon sa walo ka pulis ang patong-patong nga kaso nga gipasaka batok kanila sa pamilya sa tulo ka batan-ong kalabut sa gikaengong pagpatay sa mga teenagers.
Matud ni Brig. Gen. Jimili Macaraeg, director sa Police Regional Office (PRO-12) miagi ang tanan sa ‘proper’ investigation ug angayang atubangon sa walo ka sakop sa Sultan Kudarat Lambayong Municipal Police Station.
Nagtuo ang opisyal nga patas ang gihimong imbestigasyon batok sa mga sakop nga gilambigit sa maong krimen. Kasong pagpatay ang gipasaka batok nilang Maj. Jehnameel Toñacao, hepe sa presinto; Senior Master Sergeant Syril Mahaddi; Corporals Elpedio Garlit ; Joffrey Apalla, Patrolmen Nicol Dion Toreja, Basser Mako, Mario Rombaoa Jr., ug Roldan Claveria.
Lakip sa gipasakang kaso mao ang planting of evidence, falsification of documents ug grave misconduct ug kini ang gipasaka sa Department of Justice (DOJ) sa kaulohan.
Gimaneho sa mga teenagers ang ilang bag-ong motorsiklo atong Desyembre 2, 2022 dihang gikaengong napatay sa mga pulis. Una nang, gibutyag sa report sa kapulisan nga gipara nila ang motor sa checkpoint apan misutoy og padagan nga miresulta sa gukdanay. Natumba ang motor ug didto na sumala pa gipabuthan sa mga batan-on ang kapulisan ug nagsugod ang buthanay. I Richel Gubalani