LEGAZPI CITY – Short-circuit an pighihiling asin pigtutudo kan Bureau of Fire Protection (BFP) Legazpi na kawsa kan nangyaring kasulo sa itaas na parte kan sarong establisimento digdi sana sa Rizal Street, Brgy. Lapu-lapu, syudad kan Legazpi kan nakalihis na Sabado, Setyembre 16.
Pigsabi ni BFP Legazpi Intelligence and Investigation Chief asin PIO SFO Madonna Orendain – Rempillo sa Brigada News FM Legazpi, gibo sa light materials an establisimento asin nadipisilan sindang hanapon an ginikanan kan kasulo sa lugar huli ta kadakol sindang nahiling na mga karton sa laog.
Maabot man sa PHP840,000 an pigkakalulong kantidad nin danyos sa nangyaring insidente.
Ini su boot an saindang inisyal na assessment sa nasambit na kasulo.
Mientrastanto, segun kay Rempillo, nagdeklarar sinda nin 2nd alarm kaidtong alas 10 nin aga huli ta paragal na an saindang Firefighting Unit asin ubos naman an saindang self-contained breathing apparatus kaya nangaipuhan na sinda nin tabang kan iba pang hepatura.
Magigiromdoman, alas 8 nin aga kan makaresibe su boot sinda nin apod dapit sa insidente kaya tulos sindang nagresponder.
Labi sa 4 na oras nagdurar an kasulo antes ideklarar na fire out alas 12:53 nin hapon.