-Reymund Titong
KABANKALAN CITY, Negros Occidental — Labing una nga CHICKS Motourismo ukon motorcycle tourism adventure ride sa 6th district sang Negros Occidental, ang natalana nga patigayunon sa palaabuton nga Agosto 24-25, 2024.
Suno sa Facebook post sang Sipalay City LGU, ang motourism ang may tinutuyo nga mapakita sa mga turista ang kanami sang distrito, kag ginalantaw man nga may potensyal nga mangin sentro sang motorbike tourism sa probinsya.
Lima ka mga local government units (LGUs) ang makigbuylog sa aktibad, nga amo ang mga banwa sang Ilog, Candoni, Cauayan, Hinobaan, kag syudad sang Sipalay kag Kabankalan. Ginalantaw man sang mga tourism officers sang lima ka LGU nga ang nasambit nga aktibidad ang maka ganyat sang mga motorbike enthusiasts, kag influencers.
Ang mangin ruta sang adventure ride ang gina-planuhan pa, apang, paga-libuton sang mga riders ang bug-os nga distrito agud mapakita kag ma-experyensiyahan ang mga manami nga tourist spots, duna nga kultura, bag-o nga mga road infrastructures, kag iban pa nga mapa-bugal sang CHICKS area.
Isa man sa tumong sang amo nga aktibidad ang masuportahan ang mga micro, small, kag medium enterprises (MSMEs) paagi sa pag promote sang mga lokal nga mga produkto, nga amo naman ang isa sa mga butang nga nagapatib-ong sa ekonomiya sang rehiyon.*