Aminado si Trade Union Congress of the Philippines (TUCP) Legislative Officer Paul Gajes na hindi sila masaya sa inaprubahang dagdag na P35 para sa sahod ng mga manggagawa sa private sector sa Metro Manila.
Sa panayam ng Brigada News FM Manila kay Gajes, sinabi nitong napakalayo nito sa kanilang isinusulong na P150 wage hike.
Ayon kay Gajes, walang maibigay na rason ang Regional Tripartite Wages and Productivity Board kung bakit P35 ang ibinigay na wage increase.
Hindi raw nila alam kung saan ito nanggaling.
Dahil dito, tiniyak ng TUCP na lalo nilang ipagpapatuloy ang isinusulong nilang inihaing panukala sa Kamara na P150 across-the-board na wage recovery act.