HUGOT nga nagapasalamat ang usa ka pamilya nga laing benepisyaryo sa ‘Ang Payag Project.’
Ang Payag Project sa Brigadahan GenSan ilawom sa KaBrigada Foundation nga gimugna ni Idol Brigada Elmer Catulpos.
Ang Duhaylungsod Family gapuyo sa ilang gubaon nga balay sa Purok 5 Intake, Barangay Mabuhay sulod sa pipila ka tuig ang karon, hamugaway na karon ang ilang balay.
“Dili na mi mag-antos sa kalisud sa among daang puy-anan, salamat kaayo,” asoy ni Reynaldo Duhaylungsod, 55-anyos.
“Nalipay kaayo ko, dili ko katuo nga matupad akong giampo sa Ginoo,” dugang pa ni Duhaylungsod.
Usa ka manghihilot si Duhaylungsod, siya ug iyang asawa nga si Jenalyn Mission nga usa ka kasambahay ang naningkamot arun makakaon sila ug ilang pamilya sa adlaw adlaw, ug mapa-eskwela ilang mga anak na si Regine, 13, ug si Regie, 11.
Sila ang ika-10 nga nagrasyahan sa Ang Payag Project ug mismo si Rotary Club of Dadiangas ug Executive Vice President sa Brigada Group, Yelcy Yasay-Catulpos ang nag-turn over sa balay.
“Nalipay kaayo mi nga gihimo ang Brigada ug Rotary Club nga instrumento para maka share ug blessings,” sulti ni Mrs.Catulpos.
Ang proyekto gisuportahan sa Brigada Group, Rotary Club of Dadiangas, DJ Engine Oil Trading, DRU Construction, GT Sakura Trading Surplus Mall, Sto. Niño Aqua Fishing Venture Corp., Philam Life ug sila Joel ug Claire Inabangan.