Lalaki, arestado sa pagnanakaw ng LPG tank sa Batangas City; kasama, nakatakas

Arestado ang isang lalaki habang pinaghahanap na ang isang kasama nitong isinakay sa tricycle at tinangay ang dalawang tangke ng Liquified Petroleum Gas o LPG tank sa Diversion Road, Brgy. Bolbok, Batangas.

Kinilala ng Batangas City Police Station ang suspek na si Rex Alcera Reales, 29 anyos at tubong Legaspi Albay at residente ng Brgy. Banaba South, Batangas City.

Ayon sa imbestigasyon, isinakay umano ng suspek na si Reales ang dalawang tangke ng LPG sa tricycle (Bangkulong) na minamaneho ng isang hindi pa nakikilalang suspek.

Umaabot sa P5,600 ang halaga ng dalawang tangke na pagmamay-ari ng biktima na si  Jayson Layosa , 39 at residente ng Brgy. Balagtas.

Sinabi sa Brigada Batangas ng imbestigador na si PSMS Teodorico M Magboo na naaresto ang suspek sa ikinasang follow up operation ngunit hindi na naabutan ang kasama nitong nagmamaneho ng tricycle.

Narekober mula sa suspek ang isang tangke ng LPG na kanilang ninakaw.

Nasa kustodiya na ng Batangas CPS ang naarestong suspek at mahaharap sa kasong Theft.

Nagpapatuloy ang imbestigasyon sa naturang pangyayari.

Leave a Reply

Your email address will not be published. Required fields are marked *