Patay ang isa ka lalaki matapos nga ginluthang sang wala makilala nga suspetsado sa Sitio Moto, Barangay Cogon, Panitan, Capiz, takna 1:00 kaina sang kaaganhon, Martes, Agosto 8.
Ginkilala ang biktima kay Clark Frederick Villaruz, 37-anyos, residente sang Barangay Ilawod, banwa sang Pontevedra.
Sandig sa imbestigasyon sang Panitan Municipal Police Station, samtang yara sa iya puluy-an si Romeo Moleño, isa ka katapo sang BPAT hinali nalang ini nakabati sang lupok rason nga iya ini gintsekyar kag didto niya nakita ang biktima nga si Villaruz nga nagakayaon kag wala na sang kabuhi, matapos matumba sa iya ginasakyan nga motorsiklo.
Nag-angkon sang igo sang bala sa ulo ang biktima nga gintunaan sang iya kamatayon.
Narekober sang mga kapulisan ang basiyo sang caliber. 45 pistol nga ginapatihan gingamit sa pagpangluthang.
Ginapahayag nga samtang ginarikisa ang bulsa sang biktima agud pangitaan sang identification didto nakita ang 4 ka sachets sang ginaalegar shabu. Sa karon, nagapadayon pa ang imbestigasyon sang mga kapulisan kun may kahilabtanan sa iligal nga droga ang pagpatay sa biktima. | Judy Ann Juare