Dead on the spot ang usa ka lalaki nalambigit sa ilegal nga drugas ug giingong mi surrender na sa maong nahisgutang ilegal nga bisyo human kini gipusil sa wala mailhing mamumuno samtang natug sa tindahan dool lang sa iyang gipoy-an sa Sitio Kawayanan, Purok Centro, Barangay Lagtang, dakbayan a Talisay pasado 11:00, Miyerkules sa gabii, Hunyo 26, 2024.
Giila ang biktima nga si Boy “Eboy” Echavez, 28 anyos, walay trabaho, dunay mga anak og miipon lang og puyo sa iyang inahan sa nahisgutang dapit.
Sa inisyal nga paghiling sa SOCO sa patayng lawas sa biktima adunay lighter, selpon, gamayng kantidad sa kwarta ug usa ka screw driver. Nasayran nga duna pud kiniy samad pinusilan sa iyang ulo.
Usa sa silingan sa biktima nga wala mobutyag sa iyang pangan, miingon nga ilang nasayran ang biktima nga dunay gidoolan aron sa pagpahibawo nga mo undang na sa kalambigitan sa shabu sa ilang dapit.
Nakadungog ang silingan sa biktima og upat ka buto sa wala matino nga armas samtang ang responsable sa krimen giingon naglakaw lang padung sa sapa.
Mga kabanay sa biktima wala moluwat sa pamahayag. Kasamtangan pang gipadayon ang gihimong imbistigasyon sa Talisay City Police sa maong pagpamusil. //