Arestado ang 23-anyos nga lalaki matapos nakuhaan sang indi lisensyado nga armas-luthang sa Brgy. Poblacion, Mambusao, Capiz.
Ginkilala ang nadakpan kay Jeriel Asiong Olog, isa ka mangunguma kag residente sang Brgy. Maliao sa banwa sang Tapaz.
Sandig sa impormasyon nagikan sa Mambusao Municipal Police Station, takna alas 8:41 sang aga kahapon sang Martes, Setyembre 19 nagsulod ang suspetsado sa Mambusao Hall of Justice kun sa diin gintsekyar sang security guard nga si PJay Barrera Ogbac, 37-anyos ang bag sang suspek kag didto nakit-an ang isa ka unit sang Colt. 45 pistol kag 2 ka magazine nga may 12 ka mga bala.
Gilayon ini nga gin-turn over sa mga kapulisan kag napaslawan naman ang suspek nga magpresentar sang nagakaigo nga dokumento sa nasambit nga armas-luthang.
Magapangatubang ini sang kaso nga paglapas sa RA 10591 ukon “Comprehensive Firearms and Ammunition Regulation Act” kag COMELEC Resolution no. 10924. Sa karon, nagapabilin ini sa Mambusao PNP para sa nagakaigo nga disposisyon. | Judy Ann Juare