Padayon pang giila sa kapulisan ang usa ka lalaki nga napatay human misukol sa otoridad atol sa pagsita niini gumikan sa taho nga pagpangawat unta sa usa ka auto shop sa Amolo Street, Bangkal, Brgy. Talomo, ning syudad.
Una niini, nagpakitabang sa kapulisan ang usa ka indibidwal nga personal nga miadto sa Talomo Police Station aron nga ireport ang giingong pagpangawat nga nahitabo sa ilang auto shop nga nahimutang sa Santan Street, Bangkal, ning syudad.
Gihulagway pa niini ang suspek kinsa giingong armado sa wala matinong kalibre sa armas, nga slim ang panglawas niini, anaa sa 30-35 anyos, nagsul-ob og mixed color nga t-shirt nga blue ug itom nga dunay yellow ug giparesan og short pants, sakay sa trisikad alas-10:45 sa gabii niadtong milabay’ng adlaw.
Paspas sab nga miresponde ang kapulisan sa maong sumbong ug nagpahigayon og intel monitoring duol sa maong lugar.
Nasiplatan sa intel personnel sa may Amolo St. ang usa ka lalaki nga tugma sa gihulgaway sa reklamante hinungdan nga gisita kini ug nagpailang sakop sila sa kapulisan, apan inay nga malinawon nga motahan sa iyang kaugalingon, mibunlot kini sa iyang armas ug gipamusil ang mga mirespondeng otoridad.
Isip panalipod sa kaugalingon, mibalos sa pagpabuto ang kapulisan hinungdan nga nakaangkon og samad sa lawas ang suspek nga daling gidala sa SPMC apan wala kini natabang ug nabugtoan sa iyang kinabuhi.
Padayon hinoon ang imbestigasyon sa kapulisan kalabotan sa nahitabo ug aron mailhan ang pagkatao sa naasoy nga suspek.