Patay ug nagkaligo na sa iyang kaugalingong dugo ang usa ka lalaki human human gi-puspusan ug tubo sa iyang higala gumikan sa adunay init nga panag lalis diha sa may Purok-8, Quarry, Brgy Basa, Trento, Agusan del Sur ning nakalabayng adlaw.
Giila ang biktima nga si Jermy Buatan, 43 anyos, biyudo, panday ug residente sa nahisgutang lugar. Samtang ang gitudlong suspetsado naila usab sa pangalang Joseph Havana hingkod ang edad, panday ug residente sa susamang lugar.
Base sa nahimong imbestigasyon ug sa mga silingang nakakita ang biktima ug ang suspetsado nagsakay matud pa ug motorsiklo samtang nag biyahe pauli sa ilang lugar kalit lamang nga dunay nahitabong panaglalis ang duruha nga nahimong posibleng rason nga miabot sa higayon sa ilang panag away dayon gi pus-pusan sa suspetsado ang biktima ug naigo ang iyang ulo gamit ang steel pipe kun tubo.
Tungod sa nahitabo, buak ang ulo ug patay na nga nahidangat sa balay tambalanan ang biktima. Sa pagkakaron padayon gihapon ang gihimo nga imbestigasyon sa mga kapulisan batok sa suspetsado human sa gihimong ngilngig nga kremin.
