Lalaki, patay matapos ginbuno sa banwa sang Dao

Dead on arrival sa ospital ang 43-anyos nga lalaki matapos ginbuno sang iya kaupod sa ilimnan takna alas 11:45 kagab-i sang Huwebes, Marso 9 sa Barangay Duyoc, banwa sang Dao.

Ginkilala ang napatay kay Julito Esteban, samtang ang suspek amu si Apolonio Olano, 52-anyos lunsay residente sang nasambit nga barangay.

Sandig sa imbestigasyon sang Dao Municipal Police Station, magkaupod nga nagainom-inom sang makahulubog nga ilimnon sanday Esteban kag Olano sa payag ni Ruben Ebron, sang may nagpatunga nga indi pag-intindihanay sa duha kag hinali nalang nga ginbuno ni Olano ang biktima sa nawala kag tuo nga dughan.

Ginpadangat pa sang Dao Emergency Response Unit sa ospital si Esteban apang gindeklarar sang doktor nga patay na.

Narekober sa lugar ang kutsilyo nga may 18 ka pulgada ang kahabaon nga ginturn-over naman sang mga barangay tanod sa  kapulisan.

Sa karon, padayon pa ang imbestigasyon sang Dao PNP sa nasambit nga insidente. | Judy Ann Juare