Subling nagpahimangno ang kapulisan sa Davao del Sur nga dili kalimtan ang pagsuot og helmet ugaling mubyahe gumikan pipila sa mga nakabsan sa kinabuhi tungod sa pagpasagad niini sa kalsada.
Kini human sa nahitabong bangga diin patay diha-diha dayon ang usa ka lalaki nga nagmaneho og motor nga walay suot nga helmet nga maayong pagkabunal sa ulo niini sa semento sa may Brgy. Buri, Matanao, Davao del Sur alas 7:30 sa gabie Hulyo 6, 2023.
Giila ang biktima nga usa ka Jake Ambat Salinas, 42 anyos minyo, drayber, ug kasamtangang nagpuyo sa Brgy. Dongan Pekong, Matanao, Davao del Sur.
Sa report sa kapulisan sa Matanao MPS, gikan matud pa ang biktima sa Kiblawan, Davao del Sur sakay sa sa iyang motorsiklo, nga adunay dala nga “BARA” nga gigaid sa likod nga bahin sa iyahang motorsiklo ug pag abot niini sa lugar sa nahitaboan, aksidente nga ming igo ang iyahang dala nga “BARA” sa usa ka pedicab nga gimaneho sa usa ka Jesus Cuizon ug maayong pagkalagpot niini sa iyahang gimaneho nga motorsiklo ug tungod sa kakusog sa impact, maayong pagkabunal sa ulo niini sa semento nga maoy hinungdan sa iyahang hinanali nga kamatayon.
Kasamtangan, gipahiluna na sa pamilya ang patay’ng lawas sa biktima.