Gipusil patay ang usa ka lalaki sa may karenderya sa merkado publiko ning dakbayan San Carlos Negros Occidental kaganihang pasado alas onse sa buntag.
Giila ang biktima nga si Wilmar Sy, 32 anyos ug residente sa St Vincent Brgy 1 ning dakbayan .
Base sa imbestigasyon ni Duty Investigator PMSgt. Jose Sanny Boy Algarme sa PNP San Carlos , samtang anaa sulod sa karenderya sa iyang mama kining biktima kalit nga niabot kining suspek sakay sa iyang pedicab ug sa walay pagduha-duha gipusil kining biktima sa makapila ka higayon hinungdan sa pagka-angkon niini ug mga samad pinusilan sa iyang lawas.
Dali pang gidala sa balayng tambalanan ang biktima apan gideklara kining dead on arrival sa doctor.
Nasayran nga nailhan ang suspek nga si alyas “Tagalog” kinsa nakaikyas homan sa insidente ug padayon karong gipangita sa otoridad.
Sa pakighinabi sa Brigada News Team sa inahan sa biktima nga si Wilma Sy, kauban niya matod pa niadtong higayona iyang anak sa pagtinda ug sud-an ug milakaw siya kadali aron dunay paliton apan sa iyang pagbalik nakahigda na kini sa salog ug napuno sa dugo.