Ginkilala sang Department of the Interior and Local Government (DILG)-Region VI ang Lupong Tagapamayapa sang Barangay Lawaan nga Regional Winner sa Search for Outstanding Lupong Tagapamayapa Incentives Awards (LTIA) – Component City Category sa ikatatlo nga tion.
Personal nga ginbaton ni Barangay Kapitan Jocelyn Asis kag iban pa nga katapo sang lupon ang nasambit nga award sa ika-32 nga Local Government Month Celebration sang DILG Region 6 nga ginhiwat sa Festive Walk Iloilo City.
Gindayaw naman ni Mayor Ronnie Dadivas ang tanan nga katapo sang Lupong Tagapamayapa sang Lawaan kag nagpahayag nga ang nasambit nga kadungganan indi lamang sang barangay kundi sang bilog nga syudad.
Suno pa sa alkalde, pamatuod ini sang maayo nga pagtrabaho sang mga opisyales sang barangay agud mamentinar sang katawhayan, pagsunod sa mga layi, kasuguan kag maayo nga pagsinalayo sa komunidad. | Judy Ann Juare