Legazpi City Agricultures Office, nanawagan sa ilang benepisyaryo ng RSBSA na maging tapat patungkol sa kanilang lupang sinasaka

LEGAZPI CITY – Nanawagan ang City Agricultures Office ng Legazpi sa mga magsasakang benepisyaryo ng Registry System for Basic Sectors in Agriculture (RSBSA) ng Department of Agriculture (DA) na maging tapat sa pagbibigay ng impormasyon sa ahensya patungkol sa mga lupang sinasaka nila.

Sa panayam ng Brigada News FM Legazpi kay Shiela R. Nas ng nasabing tanggapan, kanyang sinabi na may iilang mga magsasaka na hindi nagiging tapat sa pagbibigay ng tamang impormasyon patungkol sa lupang kanilang sinasaka, ito ay matapos na lumabas sa kanilang monitoring na may mga magsasakang malawak ang lupang nakalista sa kanilang opisina, ngunit kakaunti lamang ang nailalabas na produkto.

Sinigurado naman ni Nas na masosolusyunan ng kanilang ahensya ang ganitong mga problema sa kanilang programa, sapagkat magpapatupad na sila ng Geo-Tagging, kung saan mayroon na silang tauhan na pupunta mismo sa mga lupa ng kanilang mga benisyaryo upang beripikahin kung ilan nga ba ang tamang sukat ng lupang kanilang sinasaka at kung sino nga ba ang tunay na may-ari nito.

Kung matatandaan, ang mga magsasakang kabilang sa RSBSA ay nakakatanggap mula sa gobyerno ng mga libreng farm inputs tulad ng abono, binhi at maging cash assistance kung kaya maraming mga magsasaka ang mahihikayat magpalista sa programang ito ng DA. | JEFFREY ALTAVANO

Leave a Reply

Your email address will not be published. Required fields are marked *