BNFM BICOL—Nagpapadagos an COVID-19 vaccination sa mga nasa A2 priority o mga senior citizen sa syudad nin Legazpi.
Ini kasunod kan pag-abot kan panibagong batch kan COVID-19 vaccines kan nakaaging aldaw kun sain natawan nin dugang na suplay para sa pagbabakuna sa mga lolo asin lola.
Ginigibo an vaccination activity sa mga mall sa syudad siring kan Pacific Mall, SM City asin LCC mall.
Katakod kaini, pinagirumdom ni alkalde Noel Rosal an mga senior citizen na bawal an pag walk-in sa mga vaccination sites.
Kaipuhan suboot na magparehistro an mga mapabakuna sa online registry system o kaya magpasiring sa barangay ngani na maasisteran urog na an mga wara nin access sa internet.
Sigun sa alkalde, kaipuhan na pre-registered na o may QR Code na an mga mapasiring sa vaccination sites ngani malikayan an suruksukan huli ta by schedule an mga babakunahan.
Gabos na igwa na nin QR code o nakapagparehistro na, papaaramon kan saindang schedule ngani na madali na sana an proseso asin sigurado sinda sa saindang pagpasiring sa vaccination site.
Pinasalamatan man kan alkalde an mga mall asin mga pribadong ospital sa saindang espwerso ngani mareyalisar an sistematikong vaccination rollout para sa mga senior citizen.###
