Buotan ug walay bisyo nga pagkatawo ang paghulagway sa pamilya sa biktima sa pagpanunggab alas 2 ang takna sayo sa kadlawon Marso 13 sa national highway, Barangay Labangal ning dakbayan.
Ang biktima ang giila nga si Michael Olarte Noplabe, 43-anyos, gatrabaho isip checker sa usa ka canning factory sa siyudad ug residente sa purok San Roque, Barangay Labangal.
Gibutyag sa iyang igsuon nga si Gemma Carcillar nga mahilig lamang makighigala ang iyang igsoon, una pa man nahitabo ang krimen, nananghid pa ang biktima nga naa kini adtuan apan wala na kini naghatag og impormasyon kung asa ug kinsa ang iyang kauban.
Nakurat na lang matud pa sila sa dihang nakadawat sila og impormasyon nga nadala sa ospital si Michael apan wala na nila kini naabtan nga buhi. Samtang nagbangutan ug napuno sa kaguol si Anabel Barrientos human nga patay nang iyang naabtan ang igsuon.
Gituohan niining may ka-meet up ang biktima ug gituohan niining gibun-og pa kini una gidunggab. Sa pamahayag sa hepe sa Makar Police Station nga si PCapt. Adolf Dave Diaz gibutyag niini nga sa kasamtangan ila pang gina-ila ang posibleng kauban sa biktima una pa man nahitabo ang krimen ug kung kinsa ang responsible sa kamatayon sa biktima.
Una nang migawas sa imbestigasyon nga posibleng may kainom ang biktima una pa man kini gidunggab mahitungod sa mga botelya sa ilimnon nga narekober sa crime scene. Samtang gi-adtuan sa Brigada News Team ang lugar kung asa nahitabo ang insidente ug nasayrang duol lamang kini sa Makar police station apan dali nakasibat ang suspek.
Kalabot niini gitubag usab kini ni Diaz ug may pagpaklaro kalabot sa nahimong sitwasyon. Sa karon nanawagan na lamang ang pamilya sa biktima ngadto sa suspek nga makonsensya ug atubangon ang silot tungod sa pagpatay sa ilang igsoon. I MJ Fernandez