KALIBO, AKLAN—Nagaabot sa 652 do mga food packs nga naitao eon it LGU Kalibo as of July 21, 2021 sa Poblacion Kalibo Brgy. Council para ipanupod sa mga apektadong residente sa Oyotorong Street nga una sa idaeom makarun it granular enhanced community quarantine (GECQ).
Do nasambit nga food packs hay may sueod nga limang kilong bigas, limang sardinas, limang instant noodles, sambilog nga corned beef ag kape.
Samtang, uman man nga nagpadumdom si Kalibo Mayor Emerson Lachica sa mga Kalibonhon nga sumunod sa mga ginapatuman nga general health protocols agud nga makalikaw sa COVID-19 virus, indi magguwa it baeay kung bukon malang it importante do panaw ag likawan nga magtambong sa mga mass gatherings nga sambilog nga ginabawae it Municipal Inter-Agency Task Force (MIATF) ag it lokal na gobyerno it Kalibo. // SHERRY ANNE REUNIR-VIDAL