LGU Polomolok pwede na makadawat og Pfizer Covid-19 vaccine human makapalit og ultra-low temperature storage

Mamahimo nang mkadawat og Pfizer COVID-19 vaccine ug uban pang brand sa bakuna nga nagkinahanglan og storage nga may mas ubos nga temperatura ang local government unit (LGU) Polomolok.

Kini human nadeliver na kanila ang ultra low temperature freezer (ULF) nga gipalit sa DOLE Philippines alang sa LGU pinaagi sa private-public partnership.

Gibutyag ni Polomolok Mayor Honey Lumayag-Matti nga kini ang resulta sa partnership ug meeting sa LGU ug mga stakeholders isip pagpangandam sa gilaumang pag-abot sa mas daghang supply sa bakuna ilabi na ang Pfizer vaccine.

Ang ULF gikatahong nagkantidad og P 1.2 million. Duna kini kapasidad nga hangtud sa 105,000 doses sa Pfizer vaccine nga nanginahanglan og -80 hangtud -60 degrees Celsius nga storage temperature.

Kung kahinumduman, giawhag ni National task force against Covid-19 chief implementer ug vaccine czar, Secretary Carlito Galvez Jr. ang mga local government officials sa rehiyon 12 nga dungagan ang ilang cold storage capacities.

Sigun kang Galvez, kinahanglan dunay kapasidad ang mga LGU nga mag-handle og temperature requirements nga at least negative(-) 20 degrees Celsius aron makadawat og mas daghang supply sa COVID 19 vaccines ug makaangkon og share sa mga moabot nga deliveries sa Moderna, Pfizer-BioNTech ug Sputnik V nga mga brands.