Lima ang kumpirmadong patay, duha ang injured ug tulo ang swerteng naluwas nga walay tatsa sa pagkahugmak sa tulay sa may Sitio Kibakak, Brgy. Malamba, Marilog District, ning syudad sa Davao.
Kagahapong adlawa, July 25 tuig kasamtangan, naretrieve ang patay’ng lawas nila Jimboy Liga, 28 anyos, ulitawo, boom truck operator ug residente sa Pagan Grande, ning syudad, Elmer Sayson, 44 anyos, minyo, foreman/welder ug resident sa Brgy. Pugad Lawin, Banaybanay, Davao Oriental ug Cris Napao, 44 anyos, minyo, mason ug residente sa Balusong, Matina, ning syudad.
Una nang namatay diha diha dayon atol sa pagkahugmak si Jay Bangonan, 22 anyos, mason samtang dead on arrival sa Kibalang Hospital si Rolando Abing, 40 anyos, minyo, labor ug resident sa Sitio Kibabak, Brgy. Malamba.
Padayon pa sab nga gitambalan sa SPMC human nga na-injured sila Meljay Bero, 29 anyos, ulitawo, labor ug residente sa Monkayo ug Jonathan Dispo, 38 anyos, minyo, mason ug resident sa Catalunan Grande, Davao City.
Samtang, swerte sab nga naluwas ang tulo ka indibidwal nga walay tatsa nga mao sila Jay-ar Bughaw, 25 anyos, ulitawo, welder ug resident sa Talomo, Calinan, ning syudad, Jayson Bero, 28 anyos, ulitawo, welder ug resident sa Monkayo ug usa ka Dario Dispo, 42 anyos, minyo, foreman ug resident sa Catalunan Grande, Davao City.
Kahinumdoman nga samtang nanarbaho ang mga biktima alas-3:45 sa hapon niadtong Julyo 24 kalit na lamang nga nahugmak ang steel bridge sa nasangpit nga lugar.
Padayon pa sab nga giimbestigahan sa kapulisan ang maong aksidente.