Limang drug personality arestado, haeos P1M nga balor it droga narekober it Iloilo City PNP

Arestado ro limang drug personality sa ginkasa nga drug buy-bust operation it Iloilo City PNP sa sangka abandonadong baeay sa Desamparados, Jaro, Iloilo City, ku adlaw it Sabado.

Ro mga naarestong indibibidwal hay ginkilaea kanday Romer Castor alias Pakloy it Brgy. Tabok Suba, Lapaz, Iloilo City; Gabrillo y Berol alias Toto it Brgy. San Roque, Jaro, Iloilo; Felix Sabandal alias Amay, it Brgy. Arbesanches, San Miguel, Iloilo; Mark David Mahusay alias David it Brgy. Tab-ang, Bayawan, Negros Occidental; Jun Ong alias Junjun it Brgy. Tanza, Bonifacio, Iloilo City.

Base sa ICPO, gamit ro sangka posuer-buyer hay nabakean ro mga drug suspek it shabu sa balor nga 20,000 pesos nga buy-bust money.

Narekober sa lima ro 8 ka sachets it suspected shabu kaeakip ro buy-bust item nga nagatimbang it kapin sa 115 gramo ag ginaboebanta nga nagabalor it P782,000.00.

Owa it eabot sa illegal nga droga, narekober man kanda ro P20,000 nga buy-bust money, ag pilang drug paraphernalia.

Nakakulong eon sa Custodial Facility it Jaro Police Station ro limang naaresto ag magapangatubang sa kasong pag eabag sa RA 9165 o Comprehensive Dangerous Drugs Act of 2002. // ANN DESLENE SALAZAR

Leave a Reply

Your email address will not be published. Required fields are marked *