LEGAZPI CITY – Bagsak sa karsel an 60 anyos na lolo makalihis ining manakot gamit an sarong badil sa Purok 7, Brgy. Langaton, banwaan kan Bacacay, Albay.
Binisto ining si alyas “Alfredo” mantang an biktima iyo si Guillermo Bobier y Nuelan, 46 anyos na residente kan Purok 4, Brgy. Panal syudad nin Tabaco.
Segun sa report, nagduman an biktima sa piggery sa land parcel na pagsadiri kan saiyang live-in partner, asin nahiling niya an suspetsado na tugang sa ama kan saiyang ka-live-in bitbit an sarong badil .
Nagbanta an suspetsado sa biktima na gagadanon ini sa oras na magbaba sa lugar.
Huli sa takot, dai na nakadiretso sa piggery an biktima, asin naghagad ki tabang sa Bacacay MPS na tulos man nagresponder.
Nakuha sa suspetsado an 38. Revolver na may duwang bala.
An suspek, tulos man na dinara sa hepatura kan pulisya para sa magkakanigong disposisyon asin pigprepaparar na an kasong pagbalgar sa RA 10591 o ilegal possession of firearms na isasangat kontra sa saiya.