LEGAZPI CITY – Maabot sa labi 4,000 an numero kan mga benepisyaryo kan fuel subsidy kan Land Transportation Franchising and Regulatory Board (LTFRB) sa bilog na rehiyon kan Bicol alagad nasa labi 3,000 pa sana an nakakakua.
Segun ini kay LTFRB Bicol OIC Regional Director Paul Vincent Austria, kun sain sinabi niya na nasa labi 1,000 an dai pa nakakaresibe.
Ini huli ta may mga operators na dai nakaka-comply sa mga documentary requirements: dapat na updated an saindang OR/CR kan saindang behikulo.
Igwa man su boot na mga operator na garadan na asin an mga nawalat na pamilya, dai naman interesado sa subsidy.
Apwera kaini, huli sa pandemya, nagkapira an puminundo sa pag-operate asin dai na na-follow up.
Igwa man na operators na dai man updated an mga contact details kaya dai maapodan o ma-text.
May mga operators man su boot na dai talagang interesado sa fuel subsidy kan gobyerno o wara sindang pagkaaraman manungod digdi asin iba pa.
Huli kaini, nangapodan si Austria sa mga benepisyaryong dai pa nakakaresibe nin subsidy, aprubtesaran na an pagkakataon na ini ngani.
Magduman sana su boot sa saindang opisina ta tatabangan man sana sinda orog na kun may kulang na dokumentos nganing ma-claim an saindang subsidy.