Temporaryo una nga dili manawat ang Mactan Cebu International Airport (MCIA) ug mga International Flights sugod karung adlawa, Mayo 14 hangtud ugmang adlawa Mayo 15.
Mao kini ang gipahibawo ni Cebu Governor Gwendolyn Garcia.
Matud ni Garcia nga kini tungod kay ang 2,500 ka mga gitagana nga quarantine rooms sa 35 ka hotels nga gitumbok isip quarantine facilities, okupado ug puno na.
Gi-klaro hinuon sa tagdumala sa tugpahanan nga dili sila manirado sanglit padayon gihapon ang operasyon alang sa domestic flights ug ang bugtong nilang temporaryo nga gihunong mao ang international flights.
Nasayran nga basi sa direktiba sa gobernador, ang tanang mga Overseas Filipino Workers (OFWs) ug Returning Overseas Filipino (ROFs) nga mo-abot pinaagi sa Mactan Airport, gikinahanglang mopa-ubos sa RT-PCR test ug mohuwat pa kini ug duha ka adlaw alang sa resulta. Ang mga residente sa Sugbo nga mag-negatibo sa resulta sa swab test, tugtan ra kini nga makapa-uli dayon sa ilang tagsa tagsa ka lungsod diin didto na nila humanon ang pagpa-ubos sa home quarantine.