Tanggong karon sa prisohan ang usa ka public school teacher human giambakan sa otoridad ang matud pa gidumala niini nga drug den sa Purok 2, Poblacion, Nabunturan, Davao de Oro kagabii.
Ang suspek giilang si Dowe Eve Lago Tagud kinsa giiaresto sa hiniusang pwersa sa Philippine Drug Enforcement Agency (PDEA) Davao de Oro, Davao de Oro Police Provincial Office, ug Nabunturan Municipal Police Station.
Si Tagud ang gitudlong number 4 Provincial Target Listed Drug Personality sa Davao de Oro og kauban niining nadakpan silang Aileen Aberca, Marlyn Panon, Alejandro Tagud Jr., Jomar Tañeza ug Darwin Tusay.
Nakuha sa operayon ang onse gramo sa gitoohang shabu nga mubalor sa P165,000 lakip ang markadong salapi nga gigamit sa transakisyon sa otoridad.
Nag-atubang karon og kasong paglapas sa R.A 9165 o Comprehensive Dangerous Drugs Act of 2002 ang maestra apil ang iyang mga bisita sa nasangpit nga drug den.