Dead on arrival sa magkatuhay nga ospital ang mag-asawa matapos ang natabo nga pagbunggu-anay sang duha ka motorsiklo sa Brgy. Bolo, Roxas City pasado ala-una kaina sang kaaganhon.
Ginkilala ang mga napatay nga sanday Arante Tumanday kag Erlyn Tumanday, residente sang Brgy. Rizal, Pontevedra, Capiz.
Samtang ang suspek amo si Joselito Dela Cruz, 24-anyos, residente sang Sitio Crossing, Brgy. Cagay, Roxas City.
Sandig sa imbestigasyon sang Roxas Component City Police Station, samtang ginasubay ni Dela Cruz ang dalanon gikan sa Brgy. Lanot padulong sa City proper sakay sa iya Euro 125 nga motorsiklo, pag-abot sa Brgy. Bolo aksidente sini nga nabunggu-an ang motorsiklo nga ginamaneho ni Tumanday sa diin angkas niya ang iya asawa nga si Erlyn kag ang ila anak nga si Ayran Aline Tumanday.
Ginapahayag nga naglapaw sa linya si Dela Cruz bangud ini ang yara sa impluwensya sang makahulubog nga ilimnon.
Bangud sa impact sang pagkabunggo, lunsay nagkalatumba ang duha ka motorsiklo kag nag-angkon sang patal nga pilas sa dughan si Tumanday samtang pilas naman sa ulo ang naangkon sang iya asawa nga gintunaan sang ila kamatayon.
Nag-angkon naman sang kapilasan sa magkatuhay nga parte sang ila lawas si Aryan kag si Dela Cruz.
Ginpadangat ang mga ini sa magkatuhay nga ospital para sa nagakaigo nga pagbulong.
Sa karon, natalana nga arestuhon si Dela Cruz kun ini ang makaguwa sa ospital samtang yara naman sa kustodiya sang Roxas City PNP ang duha ka motorsiklo nga lakip sa nasambit nga insidente. | Judy Ann Juare