Nagdangat sa P3.8-million ang balor sang iligal nga droga ang nakuha gikan sa mag-live in partner nga aga pa nagpadulong sa Iloilo City para sa ila kuntani nga iligal nga transaksyon.
Ginkilala ang mga nadakpan nga sanday Rene Paches alias “John”, 41-anyos, residente sang Brgy. Man-it Passi City; kag si Jean Narciso alias “Neneng”, 29-anyos, residente sang Brgy. Aglalana, Dumarao, Capiz, lunsay high-value individuals.
Natabo ang drug buy bust operation sa Barangay Luna, Jaro, Iloilo City sang mabaklan sila sang police poseur buyer sang duha ka sachets sang suspected shabu kabaylo sang P35,000.
Narekober pagid sa paghinakop sang maglive-in partner ang 11 ka sachets nga nagabug-at sang 570 gramos kag ginabanta nagabalor tanan sang P3,876,000.
Suno kay Police Captain Glen Soliman, team leader sang Regional Police Drug Enforcement Unit, ginpahayag sini nga wala sang gina-istaran ang maglive-in partner sa syudad sang Iloilo.
Naghalin ang mga ini sa Passi City kag may plano kuntani nga mag-distribute sang droga sa duha tubtub tatlo ka tawo sa syudad sang Iloilo nga amo naman subong ang gina-validate sang mga kapulisan.
Sa karon, yara na sa kustodiya sang Jaro Police Station ang mga nadakpan kag natalana nga pasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002. | Judy Ann Juare