Bungkag ang nawong sa usa ka ulitawo human nga gitigbas sa iyang paryente nga usa ka mag-uuma sa may Purok 3B, Brgy. La Fortuna, Veruela, Agusan del Sur, niadtong nakalabyang adlaw.
Giila sa Veruela, Municipal Police Station ang biktima nga si Abjer Cajutol Capio Jr, 25 anyos, dunay live-in partner, mag-uuma ug residente sa nasangpit nga lugar. Samtang ang suspetsado giila usab sa pangalang Bimboy Cajutol Talaman, 38 anyos, residente sa susamang lugar.
Base sa nahimong imbestigasyon gibutyag ni Staff Sergeant Jezrel Paje ang imbestigador sa Veruela Municipal Police Station nga dunay nahitabong panaglalis tali na sa duha nga nahimong rason nga mikuha ang suspetsado sa iyang sundang ug gitigbas ang biktima nga naigo sa lain-laing bahin sa lawas nga naka angkon ug daghang samad ug rason sa hinanaling kamatayon.
Kahinumduman nga napatay mismo sa suspetsado ang iyang kaugalingong amahan kaniadto. Samtang ang suspetsado boluntaryong mitahan sa buhatan sa Veruela Municipal Police Station ug kasamtangan nagpa bugnaw karon sa karsel aron manubag sa salaod human sa ngilgig nga kremin.
