Wala na nadala sa ospital ang usa ka mag-uuma og nabugtoan kini sa iyang kinabuhi human napaakan og bitin nga banakon sa Sitio Panganan, Brgy. Bitaogan, San Isidro Davao Oriental.
Ang biktima nailang si Dario Masilliones, 59, ulitawo, ug nanimuyo sa nasangpit nga lugar.
Sa pakighinabi sa Brigada News sa igsuon sa biktima nga si Joel Masilliones, alas-6:00 sa buntag, anaa sumala pa sa ilang bukid ang biktima niadtong Sabado, Oktubre 9 aron nga manugway og Kabaw.
Nanguha sab sumala pa kini og a-nay para pagkaon sa mga buhi niining isda, sa dihang kalit na lamang kini nga gipaak sa nasangpit nga banakon nga iya sab nga natigbasan.
Nangayo pa kini og tabang sa iyang igsuon aron magpatambalan.
Gitambalan sumala pa kini, pinaagi sa paghigot sa batiis aron nga dili makasaka sa lawas ang venom o ‘la’ ug gitambagan nga dili tanggalon ang higot ug dili kini bas-on, gidili sab ang pag-inum og tubig.
Apan, paminaw sa biktima nga naulian na kini, gitanggal niini ang gihigot sa tiil ug namahaw dayon mi-inum og tubig.
Pila ka oras ang milabay, kalit na lamang nga naluya ang biktima hangtod nga namatay pagka-alas 12 sa udto.
Kasamtangan, gihaya na sa ilang panimalay sa San Isidro Davao Oriental ang nasangpit nga mag-uuma.