Arestado ang tatlo ka maghimata matapos nga naglikaw sa checkpoint kag nakuhaan sang armas-luthang sa Barangay Cabugao, Roxas City.
Ginkilala ang mga maghimata nga sanday Jonathan Jarce 38-anyos; Erwin Jarce 39-anyos kag Herman Jarce 49-anyos kag lunsay mga residente sang Barangay Amaga, Sigma, Capiz.
Sandig sa impormasyon nga nakuha sang Brigada News FM sa Roxas City PNP, nagapatigayon sang checkpoint ang mga katapo sang 1st Maneuver Platoon sang 1st Provincial Mobile Force Company sa Brgy. Lonoy sang naglabay ang mga suspek sakay sa isa ka motorsiklo.
Nahibaluan nga madasig nga ginpadalagan ni Erwin ang motorsiklo sa baylo nga magpondo ini sa checkpoint, bangud sa makaduluda nga panghulagon sang maghimata, ginlagas ini sang mga kapulisan kag natigayon nga madakpan sa Barangay Cabugao.
Gilayon nga ginrekisa ang tatlo kag narekober sa paghinakop ni Herman ang isa ka unit sang cal. 45 nga armas-luthang nga loaded sang apat ka bala. Sa karon, yara na sa kustodiya sang Roxas City PNP ang mga suspetsado kag natalatana nga pasakaan sang nagakaigo nga panumbungon. | Judy Ann Juare