LEGAZPI CITY – Saro sa long-term plans kan gobyerno-probinsyal kan Albay an pagpapahiwas sa mga access road sa mga lugar na harani sa pamitisan kan Bulkan Mayon.
Mawot kaini na mapahiwas an mga access road sa mga lugar kun sain pigsasagibo an dredging asin de-silting kan mga salog harane sa pamitisan kan bulkan, asin para man subuot mapakarhay an mga tinampo na harani sa river channels.
Segun kay APSEMO head Dr. Cedric Daep, saro ini sa mga napag-orolayan sa tahaw kan preparasyon kan mga proposals para sa recovery makalihis an labi sa tulong bulan na abnormalidad kan bulkan.
Kun susumahon, nasa PHP21B an kabilugang pondo na kakaipuhanon kan probinsya para sa rehabilitasyon kabale an mga short-term asin long-term plans kan opisina.