Makarun nga bumalik eon ro mapagsik nga industriya it turismo sa isla it Boracay, ginpabaskug man ni Malay Chief of Police PLTCOL DON DICKSIE L DE DIOS ro Law Enforcement Operations para sa safety it publiko.
Ginpabaskug man ro pag-promote sa Boracay bilang salbar nga travel destination.
Ku Mayo 14 ay nagpatigayun it meeting ro mga opisyal it Malay PNP kaeakip ro Officer-In-Charge it MDRRMO nga si Ms. Catherine O Fulgencio.
Sa nasambit nga meeting, naistoryahan nga ro Boracay hay ginaeauman nga magiging venue it Meeting, Incentive, ag Conferences Exhibit (MICE), ag ro Malay PNP ag MDRRMO hay nagapahaum para sa safety response ag security services.
Sa direktang mandu halin sa Philippine National Police Chief, ro Malay PNP ag iba pang PNP unit nga naga operate sa andang area of responsibility hay ginpabaskug ro andang mga tikang kontra sa kriminalidad pinaagi it pagresponde sa mga tawag nga owa pa it 5-minutos.
Ginpasiguro man ni PLTCOL DE DIOS nga pagaubrahon nanda ro responsibilidad nga gintao it Chief PNP.
Paga samitan man segun ro mga tawuhan it Malay PNP sa sangka tabletop exercise ag SIMEX kaangot sa police response sa AOR. // ANN DESLENE SALAZAR