Mamumugon, pilason matapos ginbuno sa banwa sang Panitan

Pilason ang isa ka 25-anyos nga mamumugon matapos ginbuno sang iya kaupod sa ilimnan takna alas 3:30 kaina sang hapon sa Sitio Tumbague, Barangay Bahit, Panitan, Capiz.

Ginkilala ang biktima kay Roni Edson Caceres Pacsoderon, 25-anyos samtang ang suspek amu si Johnny Bautista Dela Rosa lunsay residente sang Barangay Conciencia sa nasambit nga banwa.

Sandig sa imbestigasyon sang Panitan MPS, nagainom-inom sang makahulubog nga ilimnon ang suspek kag ang biktima sa balay ni Judy Flores sang may nagpatunga nga indi pag-intindihanay sa duha.

Bangud dire, nagkuha sang matalom nga hinganiban ang suspek kag ginbuno ang biktima sa nawala nga dughan.

Madasig naman nga ginpadangat sa Bailan District Hospital si Pascoderon agud madapatan sang nagakaigo nga pagbulong.

Nagsungka naman si Dela Rosa sa kay Mrs. Josephine Dangan asawa ni Brgy. Captain Jessie Dangan kag ila ini ginturn over sa kapulisan.

Sa karon, yara na sa kustodiya sang Panitan PNP ang suspek para sa nagakaigo nga desposisyon. | Judy Ann Juare

Leave a Reply

Your email address will not be published. Required fields are marked *