Mangunguma, ginluthang-patay sang brgy. kagawad sa banwa sang Maayon

Patay ang isa ka mangunguma matapos ginluthang sang Barangay Kagawad sa Barangay Canapian, Maayon, Capiz.

Ginkilala ang biktima nga si Freddie Mor Lucas, 27-anyos samtang ang suspek amo si Kagawad Virgilio Descalzuta sang nasambit nga barangay.

Sandig sa imbestigasyon sang Maayon MPS, naghalin sa tiangge ang biktima kaupod ang iya paka-isa kag lunsay yara sa idalum sang impluwensya sang makahulubog nga ilimun ang mga ini sang naglabay sa balay sang suspek.

Ginapahayag nga hinali nalang nakabati sang lupok ang pamilya sang biktima kag sa ila pagtsekyar duguon na si Lucas kag may igo na ini sa likod kag kilid nga parti sang lawas nga gintunaan sang iya kamatayon.

Madasig naman nga nagpalagyo ang suspek matapos makumiter ang krimen.

Sa karon, padayon pa ang imbestigasyon sang mga kapulisan kun ano ang motibo sang suspek sa pagluthang sa biktima. | Judy Ann Juare