Patay na sang nasapwan ang isa ka mangunguma matapos nakuryente sa Brgy. San Roque, Dumalag, Capiz takna alas 8:00 sang aga kahapon sang Sabado, Oktubre 14.
Ginkilala ang biktima kay alyas Felip, 57-anyos, residente man sang nasambit nga lugar.
Sandig sa imbestigasyon sang Dumalag Municipal Police Station, nasapwan na lamang sang isa man ka mangunguma ang biktima nga nagakayaon sa uyapad kag wala na sang kabuhi kun sa diin nakit-an nga ginahigdaan sini ang live wire sang kuryente kag yara sa iya luyo ang iron flow sang hand tractor.
Ginapahayag nga nagapas-an sang iron flow ang biktima kag ginaalegar nasangit ini sa nagalaylay nga live wire sa uyapad nga gintunaan sang iya pagkakuryente.
Bangud sa natabo, nag-angkon ini sang paso sa likod rason sang iya hinali nga kamatayon.
Sa karon, yara na ang bangkay sang biktima sa isa ka punerarya sa nasambit nga banwa. | Judy Ann Juare